Latest Releases

August 16, 2017

വാഗമണ്‍ - പ്രകൃതിയുടെ വരദാനം

മഞ്ഞു പുതച്ചു പിണങ്ങി നില്‍ക്കുന്ന വാഗമൺ
By: Zubair Udma
ഓരോ തവണ ചെല്ലുമ്പോഴും ഓരോ ഭാവങ്ങളായിരിക്കും വാഗമണിന്. ചിലപ്പോള്‍ മഞ്ഞു പുതച്ചു പിണങ്ങി നില്‍ക്കും. കോടമഞ്ഞല്ലാതെ മറ്റൊന്നും അപ്പോള്‍ വാഗമണ്ണില്‍ കാണാനാകില്ല. ഇണങ്ങിയും പിണങ്ങിയും വാഗമണ്‍ ചില ദിവസം നമ്മെ വരവേല്‍ക്കും. ഇടയ്ക്ക് വെയിലും മഞ്ഞും ചാറ്റല്‍ മഴയുമായി.
 യാത്ര എന്നത് ഒരു തരം ലഹരിയാണ്. അതെ മനസ്സിനും ശരീരത്തിനും സമൂഹത്തിനും ദോഷം വരുത്താത്ത ലഹരി. അതും ഇഷ്ടപ്പെട്ടവരുടെ കൂടെയാകുമ്പോഴോ അതിലേറെ മുധുരിതം. അർദ്ധ രാത്രിയുടെ അന്തിയാമത്തിൽ കോരിച്ചൊരിയുന്ന മഴയെ സാക്ഷിയാക്കി ഞങ്ങൾ അഞ്ചു പേർ യാത്ര തുടങ്ങി. കാറിൽ ആയിരുന്നു യാത്ര. പ്രവാസികളും ജീവ കാരുണ്യ രംഗം തങ്ങളുടെ കർമ്മ രംഗമാക്കി മാറ്റിയ ജലാൽ തായൽ, നിസാം കാജ, സാദിഖ് സാദി, നാട്ടിൽ ജെ സി ബി വർക്കുകൾ നടത്തുന്ന ശറഫു എന്നിവരായിരുന്നു സഹ യാത്രികർ. കോരിച്ചൊരിയുന്ന മഴയത്ത് ഇരുട്ടിനെ കീറി മുറിച്ച് കൊണ്ട് യാത്ര തുടർന്നു.

 പ്രഭാതമാവുമ്പോഴേക്കും മലബാർ പിന്നിട്ടു. ഒരു 8 മണി ആകുമ്പോഴേയ്ക്കും അങ്കമാലി എത്തിച്ചേർന്നു. പ്രഭാത കൃത്യങ്ങളൊക്കെ നടത്തി ഭക്ഷണവും കഴിച്ചു വാഗമൺ ലക്ഷ്യമാക്കി യാത്ര തുടര്ന്നു. പെരുമ്പാവൂർ - മൂവാറ്റുപുഴ - തൊടുപുഴ - കാഞ്ഞാർ - വാഗമൺ ഇതായിരുന്നു റൂട്ട്.
 തൊടുപുഴ കഴിഞ്ഞതോട് കൂടി കാലാവസ്ഥയിൽ മാറ്റം വന്നു. മഴ നിഴൽ പ്രദേശം പോലെ സൂര്യ വെളിച്ചം കടന്നു വരാൻ മടിക്കുമ്പോലെയുള്ള കാലാവസ്ഥ. കാഞ്ഞാറിൽ നിന്നും വാഗമൺ ചുരം കയറുമ്പോഴേക്കും മഴയും മഞ്ഞും കൂട്ടിനെത്തി. അത് വരെ രസികന്മാരായ ജലാലിന്റെയും സാദിക്കിന്റെയും തമാശകൾ ആസ്വദിച്ചു കൊണ്ടിരുന്ന എല്ലാവരും പ്രകൃതിയുടെ മായ കാഴ്ചകളിലേക്ക് വഴുതി വീണു.
 ഇടുങ്ങിയ പാത. പാതയ്ക്ക് ഇടതു വശം അഗാധമായ കൊക്കയും നഗ്ന നേത്രങ്ങൾ കൊണ്ട് എത്തിച്ചേരനാവാത്ത വിധമുള്ള ദൂരക്കാഴ്ചയും വലതു ഭാഗത്ത് കുന്നും മലയും. കുന്നുകൾക്കിടയിലൂടെ മഴക്കാലത്ത് ജനിക്കുകയും വേനൽക്കാലത്ത് മരിക്കുകയും ചെയ്യുന്ന കുഞ്ഞു കുഞ്ഞു അരുവികൾ കാഴ്ച്ചകൾക്ക് വർണ്ണമേറുന്നു. മഞ്ഞും മഴയും പ്രകൃതിയുടെ ഭാവ ഭേദങ്ങളും ഒക്കെ കണ്ടു കൊണ്ട് ഞങ്ങൾ കേരളത്തിന്റെ സ്വിറ്റ്സർലൻഡ് എന്നറിയപ്പെടുന്ന വാഗമണ്ണിലേക്ക് പ്രവേശിച്ചു. പേര് പോലെ തന്നെ സ്വപ്ന സുന്ദരമായ മൊട്ടക്കുന്നുകളും താഴ്വാരങ്ങളും ഒക്കെയായി സുന്ദരിയാണ് വാഗമൺ. ഞങ്ങൾ മൊട്ട കുന്നിനു അടുത്തായി ഒരു റൂം തരപ്പെടുത്തി. 5 പേർക്ക് 1000 രൂപയ്ക്ക് തരക്കേടില്ലാത്ത ഒരു റൂം. അവരുടെ തന്നെ താഴെയുള്ള ഹോട്ടലിൽ നിന്നും ഊണും കഴിച്ചു ഒന്ന് ഫ്രഷ് ആയി കുറച്ചു വിശ്രമിച്ചു കൊണ്ടു ഞങ്ങൾ കാഴ്ചകൾ കാണാൻ പുറത്തിറങ്ങി.
 ഞങ്ങളുടെ ആദ്യ ലക്‌ഷ്യം തങ്ങൾ പാറയാണ്, ഋതു ഭേദങ്ങൾ മാറി മറയുന്നു. മഴയും കോടയും വന്നും പോയിക്കൊണ്ടിരിക്കുന്നു. ഇടക്ക് വെയിൽ കയറി വരുന്നു. ഞങ്ങൾ തങ്ങൾ പാറയുടെ അടിയിൽ എത്തി. വണ്ടി അവിടെ പാർക്ക് ചെയ്തു. മഴ നനയാനും കാമറ പൊതിയാനും ഒക്കെയുള്ള സംവിധാനവും ആയിട്ടായിരുന്നു ഞങ്ങളുടെ പോക്ക്. തങ്ങൾ പാറ എന്ന് പറയുന്ന സ്ഥലം ഒരു മലയുടെ മുകളിൽ ആണ്. അവിടെ ഒരു ഷെയ്ഖ് ഫരീദുദ്ധീൻ എന്ന് പറയുന്ന ഒരു സാത്ഥ്വികൻ അന്ത്യ വിശ്രമം കൊള്ളുന്നു എന്നാണു പറയപ്പെടുന്നത്. ദർഗ കാണാൻ ആയും അതിലുപരി ആ കുന്നിൻ മുകളിൽ നിന്നും നോക്കെത്താ ദൂരത്തോളം കാഴ്ചകളുടെ പറുദീസയും തന്നെയാണ് ആ കുന്നിന്മുകൾ.
 ജാതി മത ഭേദമന്യേ കഠിനമായ കയറ്റവും ഇറക്കവും വക വെക്കാതെ പ്രകൃതിയുടെ കയ്യൊപ്പ് ചാർത്തിയ ഈ പ്രദേശത്തേക്ക് കടന്നു വരുന്നുണ്ട്. കോട മഞ്ഞും മഴയും മാറി മാറി വരുന്നു. കൂട്ടിനു മന്ദ മാരുതനും. പ്രകൃതിയുടെ നിറചാർത്തുകൾ കോർത്തിണക്കിയ കാഴ്ചയുടെ വസന്തങ്ങൾ വിരിയിച്ച ആ സായാഹ്നത്തെ ഇരുട്ട് കീഴടക്കിയപ്പോൾ ഞങ്ങൾ മലയിറങ്ങി. 
 മഞ്ഞു മൂടിയ ഇരുൾ വഴികളിലൂടെ ഞങ്ങൾ താമസ സ്ഥലത്തേക്ക് നീങ്ങി. ഭക്ഷണം കഴിച്ചു. റൂമിലേക്ക് മടങ്ങി. എല്ലാവരും കുളിച്ചു ഫ്രഷ് ആയി. മുറിയുടെ വാതിൽ തുറന്നു വച്ച് പുറത്ത് പെയ്യുന്ന മഴയുടെ ആർദ്ര സംഗീതം ആസ്വദിച്ചു. അസ്ഥികളിലേക്ക് തുളച്ചു കയറുന്ന തണുപ്പുണ്ടായിട്ടും ഞങ്ങൾ ആ ഇരുൾ വീണ മഞ്ഞും മഴയും പെയ്യുന്ന ആ രാത്രി ആസ്വദിച്ചു. കൂട്ടിനു പഴയ കാല പാട്ടുകളൊക്കെയായി ഞങ്ങൾ നിദ്രയിലേക്ക് വഴുതി വീണു. പിറ്റേ ദിവസം അതി രാവിലെ തന്നെ ഉണർന്നു. എല്ലാവരെയും ഉണർത്തി പ്രഭാത കർമ്മങ്ങളും പ്രാർത്ഥനയും കഴിഞ്ഞു അത് രാവിലെ തന്നെ പൈൻ വാലി ലക്ഷ്യമാക്കി നീങ്ങി. ഇട തൂർന്നു നിൽക്കുന്ന പൈൻ മരങ്ങൾ നമ്മെ മറ്റൊരു ലോകത്തേക്ക് എത്തിക്കുന്നു. സൂര്യപ്രകാശം കടക്കാത്ത ഇരുൾ വീണ നിഴൽ പ്രദേശമായ പൈൻ വാലിയുടെ സൗന്ദര്യം പറഞ്ഞറിയിക്കുക പ്രയാസമാണ്. ഒരു മണിക്കൂറോളം അവിടെ ചിലവഴിച്ചു പ്രഭാത ഭക്ഷണവും കഴിച്ചു വാഗമണ്ണിന്റെ തിലകക്കുറിയായ മൊട്ടക്കുന്നുകൾ ലക്ഷ്യമാക്കി നീങ്ങി കൗണ്ടറിൽ നിന്നും ടിക്കറ്റും എടുത്ത് മൊട്ടക്കുന്നിൽ കയാറുമ്പോഴേക്കും മഴ തകർത്ത് പെയ്യുന്നു.
മഞ്ഞും മഴയും തമ്മിൽ പ്രണയിക്കുന്ന സുന്ദരമായ കാഴ്ചയും അനുഭൂതിയും..... മൊട്ടക്കുന്നുകൾക്ക് വെള്ളി പട്ടു പുടവ അണിയിച്ചത് പോലെ കോട മഞ്ഞും വശം ചുറ്റി നിൽക്കുകയാണ്. മഴയെ വക വെക്കാതെ മൊട്ടക്കുന്നിന് സമീപത്തെ ചെറിയ തടാകത്തിൽ അൽപ സമയം ചിലവഴിച്ചു. ബോട്ടിങ്ങിനും റഫ്റ്റിംഗിനും സൗകര്യമുണ്ട്. താല്പര്യമുള്ളവർക്ക് ആവാം...... 
തിരിച്ചു ഇറങ്ങും നേരം പരസ്പരം കാണാനാവാത്ത വിധം കാമറ ഫോക്കസ് ചെയ്യാൻ പോലും പറ്റാത്ത വിധം കോടമഞ്ഞു മൊട്ടക്കുന്നുകളെ ആവരണം ചെയ്തിരിക്കുകയായിരുന്നു.
 കുരിശു മല ആയിരുന്നു അടുത്ത ലഖ്‌ഷ്യം. ക്രിസ്തീയ ആത്മീയത നിറഞ്ഞു നിൽക്കുന്ന ആ പ്രദേശവും കാഴ്ചകൾക്ക് വസന്തമേകുന്ന ഒരു പറുദീസ തന്നെയാണ് കുരിശു മലയും പരിസരവും. തൊട്ടടുത്താണ് മുരുകൻ മലയും. കണ്ണിനും മനസ്സിനും വിരുന്നൂട്ടിയ വാഗമണ്ണിനോട് വിട പറഞ്ഞു കൊണ്ട് ഞങ്ങൾ കോട്ടയം ജില്ലയിലെ ഇല്ലിക്കൽ ലക്ഷ്യമാക്കി നീങ്ങി...

Image Gallary - :



































Read »

കാടിന്റെ ഇരുള്‍ നിറഞ്ഞ വശ്യത തേടി ഒരു നെല്ലിയാമ്പതി യാത്ര

കാടിന്റെ ഇരുള്‍ നിറഞ്ഞ വശ്യത തേടി ഒരു നെല്ലിയാമ്പതി യാത്ര...

മഞ്ഞുമൂടി കിടക്കുന്ന മല നിരകളിലേക്ക് ഒരു യാത്ര... പാവപ്പെട്ടവരുടെ ഊട്ടിയിലേക്കുള്ള യാത്ര...

 പാലക്കാടിന്റെ വശ്യസൗന്ദര്യം മുഴുവന്‍ പ്രകടമാക്കി, യാത്രികരെ കടുംപച്ച വിരിയിച്ച കാട്ടുചോലകളിലേക്ക്‌ കൂട്ടികൊണ്ട്‌ പോവുന്ന നെല്ലിയാമ്പതി എങ്ങനെ പാവപ്പെട്ടവന്റെ ഊട്ടിയാവും..? നെല്ലിദേവതയുടെ ഊരായ നെല്ലിയാമ്പതിക്കാടുകളുടെ കുളിരും സൗന്ദര്യവും അനുഭവിക്കണമെങ്കില്‍ അതിനു നെല്ലിയാമ്പതിയിലേക്ക്‌ തന്നെ വരണം.
 

ഊട്ടിക്ക്‌ പകരമാവാന്‍ നെല്ലിയാമ്പതിക്കോ, നെല്ലിയാമ്പതിക്ക്‌ പകരമാവാന്‍ ഊട്ടിക്കോ ആവില്ല. യാത്രയുടെ ആനന്ദം രണ്ടിടങ്ങളിലും വ്യത്യസ്‌തമാണ്‌ എന്നതു തന്നെ കാരണം. പാലക്കാടിൻറെ മാത്രമല്ല, കേരളത്തിൻറെ മൊത്തം സൌന്ദര്യമാണ് നെല്ലിയാമ്പതി മലനിരകൾ. ആരെയും മോഹിപ്പിക്കുന്ന നെല്ലിയാമ്പതി.. തേയില, കാപ്പിത്തോട്ടങ്ങളും പിന്നെ കേരളത്തില്‍ മറ്റെങ്ങുമില്ലാത്ത ഓറഞ്ച് തോട്ടങ്ങളും നിറഞ്ഞതാണ് നെല്ലിയാമ്പതി. യാത്രയ്ക്കിടെ പാലക്കാടന്‍ കാറ്റ് ഓടിയെത്തുമ്പോള്‍ മനസിന് വല്ലാത്ത കുളിര്‍മയായിരിക്കും...

നമ്മുടെ നാടിന്റെ മനോഹാരിത വിളിച്ചോതുന്ന സ്ഥലങ്ങളാണ് ഈ യാത്രയിലുടനീളം ഉള്ളത്. കേരളത്തില്‍ ഓറഞ്ച് തോട്ടമുള്ള ഒരേയൊരു വിനോദ സഞ്ചാരകേന്ദ്രമാണ് നെല്ലിയാമ്പതി.

 നെന്മാറയില്‍ നിന്ന് നെല്ലിയാമ്പതിയിലേക്കുളള യാത്ര അതിമനോഹരം തന്നെയാണ്. നെന്മാറയില്‍ നിന്ന് നെല്ലിയാമ്പതി വരെ 44 കിലോമീറ്റര്‍ ദൂരമുണ്ട്. ഹെയര്‍പിന്‍ വളവുകള്‍ കയറി മലനിരകളുടെ ഉച്ചിയിലേക്ക്. കോടമഞ്ഞു മൂടിയ ഇവിടം സഞ്ചാരികളുടെ പറുദീസയാണ്.

ബോട്ടിംഗ് സൗകര്യമുളള പോത്തുണ്ടി ഡാമാണ് മറ്റൊരു ആകര്‍ഷണം. നെല്ലിയാമ്പതിയിലെ ആദ്യത്തെ പട്ടണമാണ് കൈകാട്ടി. നെന്മാറയില്‍ നിന്ന് 26 കിലോമീറ്റര്‍ അകലെയാണിത്. കൈകാട്ടിയില്‍ നിന്ന് 9 കിലോമീറ്റര്‍ അകലെയാണ് പോത്തുണ്ടി ഡാം. നെല്ലിയാമ്പതി മലയുടെ താഴ്‌വാരത്തിലാണ് അണക്കെട്ട്. ധാരാളം ഹെയര്‍പിന്‍ വളവുകള്‍ പിന്നിട്ടാണ് യാത്ര. 

കൈകാട്ടിക്ക് സമീപത്താണ് കേശവന്‍പാറ. ഇവിടെ നിന്നു നോക്കിയാല്‍ താഴ്‌വാരം മടക്കുകളായി പരന്നുകിടക്കുന്നതു കാണാം. ഇവിടത്തെ തെയില തോട്ടങ്ങളിലൂടെ ആസ്വദിച്ച് യാത്ര ചെയ്യാന്‍ ഒരു സുഖമാണ്. ഒരു വെക്കേഷന്‍ യാത്ര തിരിക്കാന്‍ പോകുമ്പോള്‍ അത് നെല്ലിയാമ്പതി പോലുള്ള സ്ഥലത്തേക്കാണെങ്കില്‍ യാത്ര കൂടുതല്‍ ഹൃദ്യമാകും.

പാലക്കാട് ആണ് നെല്ലിയാമ്പതിക്ക് ഏറ്റവും അടുത്തുളള റെയില്‍വേ സ്‌റ്റേഷന്‍. പാലക്കാട് നിന്ന് 55 കിലോമീറ്റര്‍ അകലെ കോയമ്പത്തൂര്‍ ആണ് ഏറ്റവും അടുത്തുള്ള വിമാനത്താവളം. പാലക്കാട്ടു നിന്ന് നെല്ലിയാമ്പതിക്ക് കെ.എസ്.ആര്‍.ടി.സി സര്‍വീസുകളുണ്ട്. സ്വകാര്യയാത്രക്കാര്‍ക്ക് ദുര്‍ഘടം പിടിച്ച മലമ്പാതകള്‍ ആയതിനാല്‍ ജീപ്പ് ആണ് ഉത്തമം.

Image Gallary - :



































Read »

August 11, 2017

കോടമഞ്ഞിൻ താഴ്‌വരയിലൂടെ കക്കയം യാത്ര

കോടമഞ്ഞിൻ താഴ്‌വരയിലൂടെ കക്കയം യാത്ര മലബാറിന്റെ മൊഞ്ചത്തിയായി കക്കയം

പ്രകൃതി കനിഞ്ഞനുഗ്രഹിച്ച കോഴിക്കോട്ടെ കക്കയം വിനോദ സഞ്ചാര കേന്ദ്രത്തിലെ കാഴ്ചകള്‍ കണ്ട് കോടമഞ്ഞിൻ താഴ്‌വരയിലൂടെ ഒരു കക്കയം യാത്ര. കോഴിക്കോട് ജില്ലയിൽ മലബാറിന്റെ ഊട്ടി എന്നറിയപ്പെടുന്ന നയന മനോഹരമായ സ്ഥലമാണ് കക്കയം.. അനുനിമിഷം മാറുന്ന കാലാവസ്ഥയാണ് പ്രത്യേകത. നോക്കി നിൽക്കെ വെയിൽപോയി മഴയെത്തും, തൊട്ടുപിന്നാലെ കാടിറങ്ങിയെത്തുന്ന കോടമഞ്ഞിന്റെ പുതപ്പണിയും മലബാറിന്റെ ഈ മൊഞ്ചത്തി. കോഴിക്കോട് നിന്നും 45 കിലോമീറ്റർ ബാലുശ്ശേരി റോഡിൽ യാത്ര ചെയ്താൽ ഇവിടെ എത്തിച്ചേരാം...



 സഞ്ചാരികളെ മനം കുളിരണിയിക്കും വിധം നയന മനോഹരമായ പ്രദേശമാണിത്.. അടിയന്തിരാവസ്ഥ കാലത്ത് കുപ്രസിദ്ധമായ കക്കയം പോലിസ് ക്യാമ്പ് സ്ഥിതി ചെയ്തിരുന്നതും ഇവിടെയാണ് .. കക്കയം അങ്ങാടിയുടെ സമീപത്ത് ഡാം സൈറ്റിലേക്കുള്ള വഴി തുടങ്ങുന്നിടത്ത് കോമറേഡ് രാജൻ സ്മാരക പ്രതിമയും കാണാം.. കക്കയം അങ്ങാടിയിൽ നിന്നും 14 കിലോമീറ്റർ അകലെ മലമുകളിൽ കക്കയം ഡാം സ്ഥിതി ചെയ്യുന്നു.. ഇവിടെ സഞ്ചാരികൾക്കായി സ്പീഡ് ബോട്ട് സർവീസ് നടത്തപ്പെടുന്നുണ്ട്.. വംശനാശ ഭീഷണി നേരിടുന്ന ചിത്രശലഭങ്ങളുടെയും, സസ്യ ജന്തുജാലങ്ങളുടെയും കലവറയാണ് ഈ വനപ്രദേശം .. ചെറു വെള്ളച്ചാട്ടങ്ങളും ഇടക്കിടെ കാണുന്ന വ്യൂ പോയൻറുകളും യാത്രയെ സമ്പന്നമാക്കന്നു. കക്കയം തീർച്ചയായും കണ്ടിരിക്കേണ്ട ഒരു സ്ഥലമാണ്. കാട്ടിനുള്ളിലൂടെയുളള യാത്ര ഒരനുഭവം തന്നെ. യാത്ര ബൈക്കിലാണെങ്കിൽ പിന്നെ പറയുകയും വേണ്ട. കക്കയം ടൗൺ വിട്ടാൽ 10 Km കാട്ടിനുള്ളിലൂടെയുളള യാത്രയാണ്. ഭക്ഷണവും വെള്ളവും കരുതുക. വാഹനത്തിന്റെ കണ്ടീഷൻ ഉറപ്പുവരുത്തുക. മടക്കയാത്രയിൽ കരിയാത്തുംപാറയിലെ കക്കയം വാലിയിൽ വെള്ളക്കെട്ടുകളും, കാലംകാത്തുവച്ച മരശേഷിപ്പുകളുമുള്ള കക്കയത്തിന്‍റെ സൗന്ദര്യകാഴ്ചകൾ കാണാതെ പോരാനായില്ല. റൂട്ട് - ബാലുശ്ശേരി – എസ്റ്റേറ്റ്‌ മുക്ക് - തലയാട് – കക്കയം – കക്കയം ഡാം സൈറ്റ്. 
How could you feel when nature is presenting its best before you when you are not expecting that? Sometimes it leaves you speechless,or make you frustrated because your DSLR cam can't collect those freezing moments!
Me and Shafaf went to Kakkyam last week. It is not just the dam but a gorgeous waterfalls and a cliff that adds splendor to this deep forest area. When you climbing the narrow hill road you feel the forest getting denser and almost forming a canopy over you ,cutting off light by a certain amount as you walk to that spot. The fog was just falling on us! 
 The sweet sound of water streams and beauty of forest keeps you calm. On the way we witnessed a birthday celebration midst of misty green forest and they were kind enough to pose some photos for us. Thank you dudes.
 Kakkayam is situated 50 kms away from Calicut. The dam sight and the waterfall are 14 kms away from the Kakkayam Town. One can approach through Calicut- Balusseri route, Thalayad- Perambra route and from Kurachundu- Kallunode road. The nearest airport is Karipur International Airport and nearest Railway Station is Kozhikode Railway station.
Written By: Shihab Mecheri
 

Image Gallary - :



































Read »

August 8, 2017

പ്രക്യതി ഒരുക്കിയ സുന്ദര നിമിഷങ്ങളിലൂടെ മലപ്പുറത്തിന്റെ ചെക്കുന്ന് മലയിൽ

"കോടമഞ്ഞും മഴയും...പ്രക്യതി ഒരുക്കിയ സുന്ദര നിമിഷങ്ങളിലൂടെ മലപ്പുറത്തിന്റെ ചെക്കുന്ന് മലയിൽ"

അതിസാഹസികത ഇഷ്ടപ്പെടുന്നവർക്ക് അരീക്കോട് - ഒതായി അടുത്തുള്ള ചെക്കുന്നു മല കാണാൻ പോവാം. ചെങ്കുത്തായ വഴിയിലൂടെ കഷ്ടപ്പെട്ട് കയറിയാലും ഏറ്റവും മുകളിലുള്ള ദൃശ്യ ഭംഗി കാണുമ്പോൾ കയറിയ ക്ഷീണം മാറിക്കിട്ടും. അടുത്തുള്ള കൊല്ലം കൊല്ലി വെള്ളച്ചാട്ടത്തിൽ കുളിക്കുകയുമാവാം.



കോടയും കുളിരും..

അപ്പോഴേക്കും പച്ചപ്പുല്ലകള്‍ക്കും പാറകള്‍ക്കുമിടയിലൂടെ തണുപ്പും നെഞ്ചിലേറ്റി കോടയെത്തിക്കഴിഞ്ഞിരുന്നു. അവിടവിടെ ഉയര്‍ന്നു നില്‍ക്കുന്ന കൂറ്റന്‍ പാറക്കൂട്ടങ്ങളും പരന്നുകിടക്കുന്ന പുല്‍മേടുമാണ് ചെക്കുന്നിന്റെ സൗന്ദര്യം.മുകളിലെ കാഴ്ചകൾ ചെക്കുന്നിനെ പ്രിയപ്പെട്ടതാക്കി. വർണ്ണിക്കുന്നതിലും അപ്പുറമായിരുന്നു അത്... ചെക്കുന്ന് സൗന്ദര്യം ആവോളം നുകർന്ന് മനസ്സില്ലാ മനസ്സോടെ ഉച്ചക്ക് കൊല്ലൻ കൊല്ലി വെള്ളച്ചാട്ടം ലക്ഷ്യമാക്കി മലയിറങ്ങി.

മലപ്പുറം ജില്ലയില്‍ അരീക്കോട് ഒതായി റൂട്ടിലാണ് ചെക്കുന്ന്. മറുവശം വെറ്റിലപ്പാറ, ഓടക്കയം ഭാഗങ്ങളാണ്. മയിലാടിയടക്കമുള്ള ആദിവാസി കോളനികള്‍ മലയിലുണ്ട്. ചെക്കുന്നിന്റെ പേരിനു പിന്നില്‍ രസകരമായ ഒരു ചരിത്രമുണ്ട്. ബ്രിട്ടീഷുകാരില്‍ നിന്ന് രക്ഷപ്പെടാന്‍ ഒരു ശൈഖ് ഈ മലയില്‍ ഒളിച്ചിരുന്നുവത്രേ! ശൈഖ് ഒളിച്ച / താമസിച്ച കുന്ന് ശൈഖ് കുന്നും പിന്നീട് ചെക്കുന്നും ആയി. ഈ ശൈഖിന്റെ സമ്പാദ്യം മലയില്‍ ഒരു കുളത്തില്‍ ഭൂതങ്ങളുടെ കാവലില്‍ ഇന്നും നിലനില്‍ക്കുന്നുണ്ടെന്നത് ഇവിടുത്തെ മുത്തശ്ശിക്കഥ.

സമുദ്രനിരപ്പില്‍ നിന്ന് ഏകദേശം 600 മീറ്റര്‍ ഉയരത്തിലുള്ള ചെക്കുന്നിന്റെ താഴ്വാരത്തെ കൊല്ലം കൊല്ലി വെള്ളച്ചാട്ടവും പ്രസിദ്ധമാണ്. വര്‍ഷത്തില്‍ ഒരാളെങ്കിലും ഇവിടെ വച്ച് മരണമടയുന്നതു കൊണ്ടാണ് അപകടകരമായ വെള്ളച്ചാട്ടത്തിന് കൊല്ലം കൊല്ലി എന്ന് പേര് വന്നത്!

Written By: റഹൂഫ് കാവുങ്ങൽ

Image Gallary - :



































Read »

August 4, 2017

കാറ്റും കോടമഞ്ഞും ആസ്വദിക്കാം: മുത്തങ്ങ കാടുകളിലൂടെ...

മഞ്ഞുപുതഞ്ഞ മലകള്‍ക്കിടയില്‍ വയലുകളും കുന്നുകളും വനഭംഗികളും. തിലകക്കുറിയായി ചരിത്രസ്മാരകങ്ങളും തടാകങ്ങളും. ഇതിനിടയില്‍ തനിമ മാറാത്ത ഗ്രാമങ്ങള്‍. വേറിട്ട യാത്രകളില്‍ വയനാടിന്റെ സ്വന്തം കാഴ്ചകള്‍ ഇവയാണ്. കുളിരു പകരുന്ന ഈ ഭൂമിയിലേക്കു സഞ്ചാരികളുടെ പ്രവാഹമായി. ഒരു വിനോദസഞ്ചാര സീസണ്‍കൂടി പിറക്കുന്നതോടെ വയല്‍ നാടിന്റെ കാഴ്ചകളിലൂടെ ഒരു യാത്ര...



സുൽത്താൻബത്തേരി ഗുണ്ടൽപേട്ട് റോഡ് ഇതിൽ നമ്മുടെ വയനാട്ടുകാരുടെ പൈതൃക സ്വത്തായ മുത്തങ്ങ ഫോറസ്റ്റിനുള്ളിലെ റബറൈയിസ്ഡ് ഹൈവേയിലൂടെയുള്ള യാത്ര നല്ല സുഖമുളള ഒരു അനുഭവം തന്നെയാണ്. പച്ച പുതച്ച് തലയുയർത്തി നിൽക്കുന്ന പടുകൂറ്റൻ മരങ്ങളും മുളം കാടുകളും ശുദ്ധമായ വായുവും ഇളം കാറ്റും ഇടക്ക് ഞാൻ പോയിട്ട് പോയാ മതി എന്ന ജാഡയും മായി റോഡ് ക്രോസ്സ് ച്ചെയ്യുന്ന കൊബനും കാട്ടിയും, യാത്ര കാർക്ക് കൗതുകമാകുന്ന കുയിലും മയിലും മാനും വാനരൻമാരും ഒക്കെ ഒന്ന് കാണേണ്ട കാഴ്ച്ച തന്നെയാണ്.


അതിനെല്ലാം പുറമെ ഗുണ്ടൽപേട്ട എത്തിയാൽ മനസ്സിന് കുളിർമയേകുന്ന ഏക്കറുകണക്കുള്ള പൂ കൃഷിയും ഒക്കെ വളരെ സൂപ്പർ ആണ്..


മറുനാട്ടില്‍ നിന്നാണ് മലയാള നാട്ടിലേക്ക് ഓണമെത്തുന്നത്. ചുട്ടുപൊള്ളുന്ന മണ്ണില്‍ വെന്തുരുകിയ പച്ചക്കറി മുതല്‍ ഓണപ്പൂക്കള്‍ വരെയും കേരളത്തിന്റെ അതിര്‍ത്തി കടന്നെത്തുന്നു. ഓണം ഒരുക്കുന്നതിന്റെ തകൃതിയായ തയ്യാറെടുപ്പുകളിലാണ് കന്നഡയുടെയും തമിഴിന്റെയും അതിര്‍ത്തികള്‍ പങ്കിടുന്ന വയനാടിനോട് ചേര്‍ന്ന് കിടക്കുന്ന ഈ ചുവന്ന നാട്…

ഗുണ്ടല്‍പേട്ട...

ആര്‍ക്കോവേണ്ടി മണ്ണില്‍ ഇഴഞ്ഞു ജീവിക്കുന്ന ഒരു പറ്റം കര്‍ഷകരുടെ ഗ്രാമം. നോക്കെത്താ ദൂരത്തോളം പരന്നുകിടക്കുന്ന ചുവന്ന മണ്ണിനെ ഓരോ കാലത്തും പലതരം നിറം പുതപ്പിക്കുന്നവര്‍. നൂറ് ഏക്കര്‍ മണ്ണിന് ഉടമയായ ജന്മി കന്നുകാലി കൂട്ടത്തിനെ മേച്ചുനടക്കുന്ന,ചിലപ്പോള്‍, ഭൂമുഖത്തെ ഏകസ്ഥലം. മാറ്റിയിടാന്‍ ഉടുതുണിക്ക് മറുതുണി ഇല്ലാത്തവര്‍. തലമുട്ടുന്ന ഗുഡികളില്‍ സ്വപ്നങ്ങളില്ലാതെ കാലത്തെ തോല്‍പ്പിക്കുന്നവര്‍. ഇവിടെയാണ് വടക്കന്‍ കേരളത്തിന്റെ ഓണം ഒരുങ്ങുന്നത്.

Written By: Nishad Hakkim

Image Gallary - :


























Read »

July 12, 2017

കാനന ഭംഗി ആസ്വദിച്ച് മസിനഗുഡിയിലേക്കൊരു യാത്ര

ഞങ്ങള് മുന്നുംകൂടി കൂടിയാൽ ട്രിപ്പ് ആണ് ഏറ്റവും വലിയ ഉദ്ദേശം. പിന്നെ എത്ര യാത്രയും ദൂരവും ഒരു പ്രശ്നമേയല്ല... അങ്ങനെ റിയാസ് മച്ചാൻ ഗൽഫിലേക്ക് പോയപ്പോൾ തൊട്ടു പറയുന്നതാ നാട്ടിൽ വരുമ്പോ പണ്ട് വയനാട് കൂർഗ്ഗ് പോയപോലെ ഒരു ട്രിപ്പ് പോണമെന്ന്. അവസാനം രണ്ട് വർഷത്തിനു ശേഷം ആള് നാട്ടിലെത്തി.. പല സ്ഥലങ്ങളും ചർച്ചയിൽലെത്തി... അവസാനം Goa അല്ലെങ്കിൽ മസിനഗുഡി... അങ്ങനെ കാടും ആനയേയും കാണാനുള്ള ആർത്തി കൊണ്ട് മസിനഗുഡി ഉറപ്പിച്ചു.


നീലഗിരി ജില്ലയിലെ മുതുമലൈ ദേശീയ പാർക്കിനോട് ചേർന്നാണ് മസിനഗുഡി. കടുവ സംരക്ഷണ മേഖലയാണ് മുതുമലൈ പാർക്ക്. 150 കിലോമീറ്ററായി വ്യാപിച്ചു കിടക്കുന്ന ഈ കാട്, കർണാടകവുമായും തമിഴ്നാടുമായും കേരളവുമായും അതിർത്തി പങ്കിടുന്ന കാടു കൂടിയാണ്. ശരിക്കും മുതുമല നാഷണൽ പാർക്കിന്റെ ഭാഗം തന്നെയാണ് മസിനഗുഡി...
അങ്ങനെ മാർച്ച് 16 ആം തിയതി വ്യാഴായച്ച വൈകിട്ടു ഞങ്ങള് മൂന്നുംകൂടി അങ്ങ് വിട്ടു... വെളുപ്പിനെ അവിടെ എത്തുന്ന രീതിയിൽ... അതാവുമ്പോ മിക്ക മൃഗങ്ങളെയും കാണാൻ പറ്റുമെന്ന വിശ്വാസo...

അങ്ങനെ എറണാകുളം - തൃശ്ശർ - പട്ടാമ്പി - നിലമ്പൂര് - ഗൂഡല്ലൂർ വഴി മുതുമലയിലേക്ക്... ചെക്ക് പോസ്റ്റ് കഴിഞ്ഞപ്പോൾ തന്നെ കാടിന്റെ തീവ്രതയും തണുത്ത കാറ്റും ഒരു അനുഭവമാണ്... ആ ഭംഗിയിൽ അറിയാതെ ലയിച്ചു തുടങ്ങിയിരുന്നു. കാരണം കാടിന്റെ ഇരുവശങ്ങളിലും മാൻ കൂട്ടങ്ങൾ നിറഞ്ഞു നിൽക്കുന്നു. ചിലർ പാഞ്ഞോടുന്നു ചിലർ ഞങ്ങളെ നോക്കുന്നു ഇവർക്കെന്താ ഇവിടെ കാര്യം എന്ന ഭാവത്തിൽ ചിലർ ക്യാമറയ്ക്ക് വേണ്ടി പോസ്സ് ചെയുന്നു അതൊരു കാഴ്ച്ചയാണ്. ഇതിനിടയിലാണ് ഒരു ഭാഗ്യം പോലെ ഒരു കാട്ടാനക്കൂട്ടം റോഡിനരികിൽ നിൽക്കുന്നത് കണ്ടത് അതിൽ ഒരു കുട്ടിയാന ഞങ്ങളെ കാണാനെന്നവണ്ണം കുണുങ്ങി ക്കുണുങ്ങി നിൽക്കണ്... എന്താ പറയുക ഹോ... സന്തോഷം കൊണ്ട് മനസ്സുനിറഞ്ഞു.

ഞങ്ങൾ വണ്ടി നിർത്തിയപ്പോൾ കുണുങ്ങി കുണുങ്ങി തലയാട്ടിയൊരു കളിയാക്കൽ ..
പക്ഷെ അവറ്റയെ കണ്ടാൽ സങ്കടം വരും വരണ്ടുണങ്ങിയ കാട്ടിൽ വെള്ളവും തീറ്റയും കിട്ടാതെ മെലിഞ്ഞ ശരീരവുമായി നിൽക്കുന്ന കാഴ്ച്ച തികച്ചു സങ്കടകരമാണ്...

മുതുമലയിൽ നിന്ന് ബന്ദിപൂർലേക്കുള്ള യാത്രയിലാണ് ഈ കുട്ടിയാന കൂട്ടത്തെ കണ്ടത്.

എനിക്ക് തോന്നുന്നു ഒരു ജൂൺ ജൂലൈ മാസത്തിലാണ് മസിനഗുഡി ട്രിപ്പ് നല്ലതു. വേനൽ വെയിലേറ്റുണങ്ങിയ മഞ്ഞക്കാഴ്ചകളേക്കാൾ മഴയിൽ ഈറനണിഞ്ഞ ഹരിത വർണ്ണമായിരിക്കും കണ്ണിനു പകരുക!!!

മസിനഗുഡി ഒരു ഗ്രാമമാണ്. അത്യാവശ്യം കടകൾ. വൃത്തിയുള്ള മലയാളി ഹോട്ടൽ.

ഓഫ് ഡ്രൈവ് ആഗ്രഹിക്കുന്നവർക്ക് ട്രക്കിങ് സൗകര്യമുണ്ട്. എണ്ണൂറ് മുതൻ ആയിരം രൂപ വരെ കൊടുത്താൽ കൊണ്ടു പോകാൻ ആളുകളുണ്ട്. പക്ഷെ വില പേശാൻ കഴിയുന്നവർക്ക് വീണ്ടും കുറച്ചു കിട്ടും. അങ്ങനെ കുറച്ചു നേരം കറങ്ങി നടന്ന് ഫോട്ടോ പിടിത്തോം കഴിഞ്ഞ് റൂമിലേക്ക്. മസിനഗുഡി യിൽ നിന്ന് കാടിന്റെ അകത്ത് 2 Km കാടിനുളളിൽ ഉള്ള ഒരു റിസോർട്ടിൽ ആണ് താമസം. റിസോർട്ടിലേക്കുള്ള യാത്ര ഒരു ചെറിയ ഓഫ് റോഡ് ഫീലാണ്. അങ്ങനെ റൂമിൽ ചെന്ന് ഫ്രഷ് ആയി ഫുഡ് ഒക്കെ അടിച്ചു കുറച്ചു നേരം വിശ്രമിച്ചശേഷം വീണ്ടും ക്യാമറയും എടുത്തോണ്ട് ഇറങ്ങി... സലീം ഭായിടെ ഓപ്പൺ ജീപ്പിൽ 700 രൂപയ്ക്ക് ട്രക്കിങ് കയറി. പുള്ളി ഒരു പുലിയാണ്. 18 വർഷമായി ഇവിടെയുണ്ട് പച്ചവെള്ളം പോലെ ആള് മലയാളം പറയും.  എവിടെയൊക്കെ എതൊക്കെ സ്ഥലത്ത് മൃഗങ്ങൾ ഒണ്ടന്നും അതിനെക്കുറിച്ചും പുള്ളിക്ക് അറിയാം അത് ഞങ്ങൾ അനുഭവിച്ചറിഞ്ഞു. അതിനെക്കുറിച്ച് പറഞ്ഞ് മനസ്സിലാക്കിത്തരുകയും ചെയ്തു.


പിന്നിട് ഞങ്ങൾക്ക് ഒരു കാര്യം മനസ്സിലായി സ്വന്തം വണ്ടിയിൽ അങ്ങനെ പോകാൻ കഴിയുംമെന്ന് മനസ്സിലായി. അപ്പോത്തന്നെ മനസ്സിൽ തീരുമാനിച്ചു വീണ്ടും രാത്രിയിൽ ഒന്നു വരണമെന്ന്.

പെട്ടന്ന് പുള്ളി വണ്ടി നിർത്തിയിട്ട് പറഞ്ഞു ദേ കാട്ടുപോത്ത് എന്ന് എവിടെ ഞങ്ങൾ നോക്കിയിട്ട് കണ്ടില്ല. പുള്ളിക്ക് അവിടുത്തെ മുക്കും മൂലയും അറിയാം അതുകൊണ്ടാണ് ഒരു ചെറിയ അനക്കം പോലും കാണാപ്പാടമാണ്. ഒരു ചെറിയ വിഷമം തോന്നി. പക്ഷെ അതിനെ മറികടക്കാൻ ദേ റോഡിന്റെ നടുക്ക് നിക്കണ് ഒരണ്ണം ഓ ഒന്നൊന്നര ഒരെണ്ണം ആദ്യമായി ഇത്രോം അടുത്ത് കാണുന്നത്. ആ സന്തോഷം പറഞ്ഞ അറിയിക്കാൻ വയ്യ. ആവശ്യത്തിന്നു ഫോട്ടോ എടുക്കാനുള്ള സമയം അവൻ തന്നു പിന്നെ കാടിന്റെ വന്യയതയിലേക്ക് മറഞ്ഞു. പിന്നെ പോയ വഴി നിറയെ മാൻകുട്ടങ്ങളും മയിലും മ്ലാവും പന്നിയും കാട്ടുമുയലും എല്ലാം കണ്ണിൻ മുന്നിലൂടെ മാഞ്ഞു അപ്പോഴേക്കും സൂര്യൻ ചുവപ്പ് പരത്തിതുടങ്ങിയിരുന്നു അങ്ങനെ 2 മണിക്കൂർ യാത്രക്ക് വിരാമമായി സലിം ഭായിയോട് സലാം പറഞ്ഞ്പോന്നു.

പിന്നെ പതുക്കെ ഞങ്ങൾ റൂമിലേക്ക് പോയി ഫ്രഷ് ആയി വീണ്ടും ചുമ്മാ കറങ്ങി ഭക്ഷണവും കഴിച്ചു വരാം എന്ന് പറഞ്ഞ് റൂമിൽനിന്ന് ഇറങ്ങി മസിഗുഡി ടൗണിൽ എത്തിയപ്പോൾ കാടിനെ തണുപ്പിക്കാൻ നല്ല കട്ട മഴ. അത് ശരിക്കു മ്യഗങ്ങൾക്ക് ഒരു വലിയ ആശ്വാസമാണ്. അപ്പോ ഒരു ഐഡിയ അന്നാ ഇപ്പോ ഒന്ന് സഫാരിക്ക് പോയാലോ നമ്മടെ കാറില്. പിന്നെ ഒന്നും നോക്കീല്ല നേരേ വിട്ടു... കാറിലെ ഗ്ലാസ്സ് തുറന്നിട്ട് ഹെഡ് ലൈറ്റ് വെളിച്ചത്തിൽ കണ്ണുകൾ ആവേശത്തോടെ പരതി ഇരുട്ടിലെ സ്വർണ്ണത്തിളക്കം മാൻകൂട്ടങ്ങൾ അപ്പോഴും നിറച്ചുണ്ടായിരുന്നു പക്ഷെ മനസ്സിൽ ആഗ്രഹിച്ചത് അതൊന്നുമല്ലല്ലോ. അതിമോഹമല്ലേ മോനെ മക്കളെ... മാനും മ്ലാവും കാട്ടു മുഴലും പന്നിയും ഒക്കെ ക്യാമറ ഫ്ലാഷിൽ ഒപ്പിയെടുത്തു .. അതിനൊന്നും ഇടം തരാതെ മിന്നായം പോലെ അവൻ മറഞ്ഞു Mr കരടി... പോട്ടോം പിടിക്കാൻ കഴിഞ്ഞില്ലെങ്കിലും. പാതി സങ്കടം മാറി.

ഇരുട്ടിൽ ചീവീടിന്റെ ആണോ എന്നറിയില്ല നല്ല കരച്ചിൽ. സൈഡിൽ നിന്ന് ചില്ലിക്കമ്പ് ഉടിക്കുന്ന ശബ്ദം. പിന്നെ അതികം ദുരേക്ക് പോയില്ല പേടിച്ചട്ടല്ല. ഓ വേണ്ടാന്നു വെച്ചു. പിന്നെ വിശപ്പിന്റെ വിളിയും. 

അങ്ങനെ തിരിച്ചു ടൗണിൽ വന്ന് ഫുഡ് അടിച്ചു കഴിഞ്ഞ് ചുമ്മാ ഒന്നുകൂടി കറങ്ങി മഴപെയ്തതു കൊണ്ടാവാം നല്ല തണുപ്പ് ഉണ്ടായിരുന്നു. പിന്നെ നല്ല ക്ഷീണവും വീണ്ടും റൂമിലേക്ക്. അങ്ങനെ ക്യാമറയും ഫോണും ഒക്കെ ചാർജ്ജ് ചെയ്യാൻ ഇട്ട് നാളത്തെ പ്ലാനിങ്ങ് തുടങ്ങി


അടുത്തത് മലകളുടെ റാണിയായ ഊട്ടിയിലേക്ക്
ഊട്ടിയിൽ ഞാൻ ആദ്യമായി ആണ് പോകുന്നത്. പ്രധാന ഉദ്ദേശം ഊട്ടിയിൽ നിന്ന് മേട്ടുപാളയത്തേക്കുളഉ മലയോര തീവണ്ടി യാത്രയാണ് (കിലുക്കം സിനിമയിലെ ട്രെയിൻ). അങ്ങനെ രാവിലെ നേരത്തെ എണീക്കാം പറഞ്ഞ് കിടന്നു. നടന്നത് തന്നെ ആന കുത്തിയാലും ഏക്കാത്ത ടീമാ മൂന്നും. 

മസിനഗുഡിയിൽ നിന്ന് ഊട്ടിക്കു 30 km ആണ്. അങ്ങെനെ ഒരുവിധത്തിൽ പിറ്റേദിവസം രാവിലെ എണിട്ട് റിസോർട്ടിൽ നിന് ഇറങ്ങി. അപ്പോ ഇനി ഊട്ടിയിൽ പാക്കലാം...

ഊട്ടി പട്ടണം... ഊട്ടി പട്ടണം... പൊട്ടി കെട്ടണം ശുമ്മ വാടാ .....

By: Arjun P Rajeev

മസിനഗുഡിയിലെ ചില കാഴ്ച്ചകൾ എന്റെ ക്യാമറ കണ്ണിലൂടെ ...
NB : ഒരു ഫോട്ടോഗ്രാഫർ കണ്ണിലൂടെ ഈ ചിത്രങ്ങൾ കാണരുത്...

എഴുത്തിലെ തെറ്റും ക്ഷമിക്കുക..

 


Image Gallary - :


























Read »

Copyright © കേരള സഞ്ചാരി

Designed by ABDU RAHIMAN